„Mit hör weer de Sniee immer ’n bietje witter!“ Dor sitt Sam Baldwin, spölt van Tom Hanks, teegen sien Söhn Jonah un proot mit de Redakteurin ut Radio, de hum na sien verstürben Frau fraagt: He hett hör dorbi weer vör Ogen. „Ja, mit hör was de Sniee immer ’n bietje witter!“
„Sünner Schlaap in Seattle“ heet diesse Hollywoodfilm, de de Menschen toe Harten geiht. So is dat, wenn du wat hergeben musst, wat di so leev wesst is. De Winter is nu grau un sünner Lücht. „Ja, mit hör weer de Sniee immer ’n bietje witter!“ Man in Seattle kummt dör disse Worden ’n heel anner Richtung in dat Leben van de Witwer un sien Söhn.
Meg Ryan spölt in disse Film Annie Reed, ut Baltimore. Se hört, wat dor van Sam un Jonah proot word in’d Radio. Eegentlich is se kört dorvör, hör Verlobter Walter to heiraden. Man nu markt se, dat dor wat fehlt – Magie – dat, wat as Leevde na di grippt, wat en Menschke so heel un dall besetten kann – wat de Sniee för di ’n bietje witter maakt.
Turbulent geiht dat wieder un na un na word dütlich, dat de Leevde hör Weg wall finnen deiht. Annie hett dat, wat hör Leben bit dorhen utmaakt hett, nich mehr in d‘ Reeken. Se waagt toleedst alls – un se winnt. Anni sett alls up de Leevde un lett sük dat wat kösten.
Gifft Oogenblicken in’t Leven, dor weet man, wat richtig is. Dat is, as wenn di dann en trecken deiht in de richtige Richtung – dat du schubbst worst, off heel deep in di drin seeker worst un ruhig. Ik mutt dorhen… – ik will nu nich langer… ik will nu…
Ik mutt nu dorhen, wor He vörbikummt – ik will nu nich langer eensom un alleen weesen – ik will nu, dat min Leben in en goode Richtung geiht. Zachäus – en Man ut Bibel – weet ok up eenmal, wat nu geböhren sall. He is bi d` Zoll in Jericho un riek worden um dat he de Menschen overt Ohr hauen deiht – man nu hett he hört: Jesus kummt. Mit hum, so vertellen de Lüü, is de Welt immer n‘ bietje freedelker worr´n, moijer un vull van Leevde.
Turbulent geih ´t dann wieder mit Zachäus un na un na word dütlich, dat dat nu wall good word mit hum. He hett dat, wat sien Leben bit dorhen utmaakt hett, nich mehr in’d Reeken. He waagt alls – he klautert up en Boom un lett sük van de annern utlachen. He lett sük dat wat kösten. Aber in disse Oogenblick weet he, wat recht is un good för hum. Un Jesus röppt hum un allens word good.
Sam un Jonah un Annie klautern up kien Boom, man boven up dat Empire-State-Building, dor finnen se to ’nanner. Zachäus harr hör verstahn.
Claus Dreier